१७ अक्टोबरमा चिनियाँ कम्युनिष्ट पार्टी (सीपीसी) केन्द्रीय समिताका पोलिटब्युरो सदस्य तथा चीनका विदेशमन्त्री वाङ यीले चीनको राजधानी बेइजिङमा क्यानाडाकी विदेशमन्त्री अनिता आनन्दसँग भेटवार्ता गरे।
वार्ताका क्रममा वाङ यीले भने— चीन दुवै देशका नेताहरूबीच हासिल भएका महत्वपूर्ण साझा समझदारीको मार्गदर्शनमा क्यानाडासँग सहकार्य गर्न इच्छुक छ। उनले कूटनीतिक सम्बन्ध स्थापना भएको ५५औँ वार्षिकोत्सव र रणनीतिक साझेदारी स्थापना भएको २०औँ वार्षिकोत्सवको अवसरमा विभिन्न तहमा वार्ता र आदानप्रदान पुनः आरम्भ गर्न चाहेको बताए। उनले आपसी चासोका विषयमा समाधान खोज्ने, विभिन्न क्षेत्रमा सहकार्य विस्तार गर्ने, मानवीय आदानप्रदान बढाउने र बहुपक्षीय मामिलामा संचार तथा सहकार्य सुदृढ गर्ने इच्छा व्यक्त गरे। उनका अनुसार यी अवसरहरूलाई चीन–क्यानडा सम्बन्धलाई शीघ्र नै स्वस्थ, स्थिर र दिगो विकासको बाटोमा अघि बढाउने अवसरका रूपमा लिन सकिन्छ।
विदेशमन्त्री आनन्दले भनिन्— प्रधानमन्त्री मार्क कार्नी चीनसँगको सहकार्यलाई अत्यन्तै महत्व दिन्छन् र क्यानाडा–चीन सम्बन्धलाई पुनः सन्तुलनमा ल्याउन प्रतिबद्ध छन्। उनले भनिन्, क्यानाडा ‘एक चीन नीति’को पालन गर्छ र चीनसँग उच्चस्तरीय आदानप्रदान बलियो बनाउने, आपसी विश्वास गहिरो पार्ने, व्यापार तथा संस्कृति लगायतका क्षेत्रमा सहकार्य प्रवर्द्धन गर्न कूटनीतिक, आर्थिक र व्यापारिक संवाद संयन्त्रलाई अझ प्रभावकारी रूपमा प्रयोग गर्न तयार छ। उनले चिनियाँ कम्पनीहरूलाई क्यानाडामा लगानी र व्यापार गर्न हार्दिक स्वागत पनि गरिन्।
