काठमाडौं : आगामी निर्वाचनलाई लक्षित गर्दै राष्ट्रिय प्रजातन्त्र पार्टी (राप्रपा)का नेता डा. सुन्दर सिंह बोहोराले आफू अरू उम्मेदवारसँग होइन, “आफ्नै अन्तरात्मा र जनताको अपेक्षासँग प्रतिस्पर्धा” गरिरहेको दाबी गरेका छन्। “सबै उम्मेदवारमध्ये मलाई कति विश्वास गर्नुहुन्छ? मेरो असली प्रतिस्पर्धी मतदाता हो,” उनले भने।
डा. बोहोराले कांग्रेसतर्फ संकेत गर्दै प्रश्न उठाए, “भ्रष्टाचार गर्दिन भनेर कांग्रेसी उम्मेदवारले ढुक्कसँग भन्न सक्छन्?” आफूले सत्तामा पुगे पनि कुनै किसिमको अनियमितता नगर्ने प्रतिबद्धता दोहोर्याउँदै उनले जनताको आवाजलाई सिंहदरबार र सदनमा पुर्याउने अठोट व्यक्त गरे।
उनले आफू काठमाडौं महानगरपालिकाका प्रमुख बालेन्द्र शाह (बालेन) लाई “सलुट गर्न जान नलागेको” टिप्पणी गर्दै भने, “म व्यक्तिपूजामा होइन, नीति र परिणाममा विश्वास गर्छु।” जनतालाई प्रत्यक्ष सेवा दिनु नै आफ्नो प्राथमिकता रहेको उनको भनाइ थियो।
डा. बोहोराले मुलुक अहिले गम्भीर संकटमा परेको जिकिर गर्दै राजसंस्था पुनर्स्थापनामार्फत स्थायित्व ल्याउनुपर्ने बताए। “देश जोगाउने प्रतिबद्धतासहित हामी अघि बढेका छौं। हाइब्रिड राप्रपाले सबै नागरिकको आवाज सदनमा लगेर काम गर्छ,” उनले भने।
क्षेत्र नं. ३ का समुदायमा आफू पहिलेदेखि परिचित रहेको दाबी गर्दै उनले पुल, सडक जस्ता आधारभूत पूर्वाधारबारे “भन्नु नपर्ने—काम गरेर देखाउने” बताए। “सदनमा प्रस्तुति दिएपछि घोषणापत्रमा रहेका काम कार्यान्वयन गर्नेछु,” उनले थपे। शासन–सत्ता सिंहदरबारमै सीमित नराखी नागरिकले चाहेका मुद्दालाई संस्थागत वेग दिने उनको प्रतिवद्धता थियो।
डा. सुरेन्द्र भण्डारी: “भ्रष्टाचार अन्त्य गर्न राजसंस्था चाहिन्छ, गणतन्त्र असफल”
अर्का वक्ता डा. सुरेन्द्र भण्डारीले वर्तमान व्यवस्थामाथि तीव्र आलोचना गर्दै “आजको मुलुकको सबैभन्दा प्रमुख समस्या भ्रष्टाचार” भएको बताए। “राजनीतिले दायित्व वहन नगरे मुलुक बन्दैन,” उनले भने।
उनका अनुसार नेपाल आफ्नै किसिमको सभ्यता र धर्म–संस्कृतिमा बनेको राष्ट्र हो। रोजगारी सृजना र आम्दानी वृद्धि प्राथमिक एजेन्डा हुनुपर्ने भन्दै उनले जेनेरेसन–जेड (Gen Z) का माग सम्बोधन गर्नुपर्ने धारणा राखे। “गणतन्त्र असफल भएकैले आन्दोलन चर्किएको हो। देशमा शान्ति र स्थायित्वका लागि राजसंस्था चाहिन्छ,” उनले दाबी गरे।
डा. भण्डारीले वर्तमान प्रणालीले विदेशी चलखेललाई मलजल गरिरहेको आरोप लगाए। उनले नेपाल कम्युनिष्ट पार्टी (एमाले) र नेपाल कम्युनिष्ट पार्टी (माओवादी केन्द्र) लाई गणतान्त्रिक कित्ताका दल भन्दै “आफ्नो–आफ्नो एजेन्डा पूरा गर्न चुनावमा आएको” टिप्पणी गरे।
निर्वाचनअघि नै राजसंस्था सहितको सरकार आउनुपर्ने उनको माग थियो। “नयाँ भन्नु उमेर र लुगाले होइन, विचारले हो,” उनले भने। निर्वाचनले निकास नदिए देश विद्रोहतर्फ जान सक्ने चेतावनी दिँदै उनले राजनीतिमा नैतिकता अनिवार्य भएको धारणा राखे।
उनले व्यवसायी दुर्गा प्रसाईको रिहाइ आवश्यक रहेको उल्लेख गरे। आम मतदातालाई राष्ट्रिय प्रजातन्त्र पार्टीलाई मतदान गर्न आग्रह गर्दै “राजा आउने कुरा सुनिश्चित” रहेको दाबी गरे।
भ्रष्टाचारकै कारण युवाले रोजगारी नपाएको उल्लेख गर्दै उनले लोकतन्त्रमा भ्रष्टाचार अन्त्य नहुने तर्क गरे। “भ्रष्टाचार अन्त्य गर्न राजसंस्था चाहिन्छ,” उनको भनाइ थियो। निर्वाचन शुद्धीकरणको माग गर्दै पैसा खर्च गरेर मत माग्ने प्रवृत्ति रोक्नुपर्ने उनले जोड दिए।
उनले “राजाले राजनीति नगर्ने” दाबी गर्दै मदन भण्डारी र राजासँग सम्बन्धित हत्याका विषयमा सत्यतथ्य बाहिर आउनुपर्ने बताए। आगामी निर्वाचनलाई लक्षित गर्दै दुवै वक्ताले भ्रष्टाचार, स्थायित्व र राजसंस्थाको पुनर्स्थापनालाई मुख्य एजेन्डा बनाएका छन्। उनीहरूको दाबी, आरोप र प्रतिबद्धताले चुनावी बहसलाई थप तीव्र बनाउने संकेत देखिएको छ। NPC
