नेपाली सांगीतिक क्षेत्रमा भावनाको गहिरो स्पर्श दिने गीतहरू सधैँ कमै हुन्छन्, र त्यही सूचीमा थपिएको छ गायक अभय सुब्बाको नयाँ गीत ‘हे साइला बोलको ’। उक्त गीत हालै Abhaya and The Steam Engines नामक युट्युब च्यानलमार्फत सार्वजनिक भएको छ र सार्वजनिक भएलगत्तै दर्शक–श्रोताको मन छोइरहेको छ।
गीतको सबैभन्दा बलियो पक्ष यसको आत्मा हो—कसैको पर्खाइमा बित्ने समय, मौन प्रेम, र नबोलेका भावनाहरू। गीतले तमाङ जातिको पहिचान र संवेदनालाई अत्यन्तै सम्मानपूर्वक प्रस्तुत गरेको छ। शब्द र संगीतले मनभित्र कतै लुकेको याद र पर्खाइको पीडालाई जीवन्त बनाइदिन्छ।
भिडियोमा अलिशा राईको सशक्त अभिनयले गीतको भावनालाई अझै गहिरो बनाएको छ। उनको आँखाबाट पोखिएको पीडा र प्रतीक्षाको भाव दर्शकलाई भावुक बनाउँछ। सरोज खालिङ राई साइलाको पात्रमा देखिएका छन्, जसले कथालाई सन्तुलित र विश्वसनीय बनाएको छ। हिमाली दृश्यहरू र मनाङका रमणीय स्थलहरूमा गरिएको छायांकनले भिडियोको सौन्दर्यलाई झनै उत्कर्षमा पुर्याएको छ।कलाकार सिद्धार्थ सिंह भने खलपात्रको भूमिकामा देखीएका छन्।
भिडियो निर्देशन अभि साम्पाङ राईले गरेका हुन् भने सह–निर्देशन सृष्टि राईले सम्हालेकी छन्। बिकेश मगरको डीओपी र किवा खिम्दुङको सिनेमाटोग्राफीले दृश्यलाई झंबाई उत्कृस्ट बनाएको देख्न सकिन्छ । देवर्षि.एसको क्रिएटिभ निर्देशनले भिडियोमा कलात्मक गहिराइ थपेको छ।
गीतको शब्द, संगीत र सम्पूर्ण साउन्ड आर्किटेक्चर स्वयं अभय सुब्बाले तयार गरेका छन् भने तमाङ भाषाका शब्द हर्क हर्ष तमाङले लेखेका हुन्।
‘हे साइला बोल’ केवल एउटा गीत होइन—यो मौन प्रेम, सांस्कृतिक पहिचान र प्रतीक्षाको कथा हो, जसले नेपाली संगीतलाई फेरि एकपटक भावनाको उचाइमा पुर्याएको छ।
