राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसइई)को नतिजा ७ असारमा सार्वजनिक गर्ने घोषणा गरेको भए पनि त्यो सम्भव नभएको जनाएको छ। बोर्डका अध्यक्ष महाश्रम शर्माका अनुसार शिक्षक आन्दोलनका कारण उत्तरपुस्तिका परीक्षण ढिलो सुरु भएकोले नतिजा प्रकाशनमा ढिलाइ भएको हो।
हाल विभिन्न प्रदेशबाट प्राप्त उत्तरपुस्तिकाको तथ्यांक अद्यावधिक गर्ने कार्य भइरहेको छ र करिब ३६ लाख विवरण प्रमाणीकरणसहित प्रोसेसिङ गर्नुपर्ने भएकाले समय लाग्ने बताइएको छ।
यस वर्ष एसइई परीक्षामा पाँच लाख १४ हजारभन्दा बढी विद्यार्थी सहभागी भएका थिए भने देशभर २,०८० केन्द्र र विदेशको एक केन्द्रसहित दुईवटा कारागारबाट पनि परीक्षा सञ्चालन गरिएको थियो।
नतिजा एकैपटक सार्वजनिक गरिनेछ। बोर्डले यसपटक अग्रिम रूपमा नतिजा मिति तोकेर अन्योल हटाउने प्रयास गरे पनि व्यवहारमा त्यो सफल हुन सकेन, जसले फेरि पनि विद्यार्थीहरूलाई अनिश्चिततामा पारेको छ।
#एसइई #SEE
