बन्धु
काठमाडौँ, ३० चैतः
नेपाली राजनीतिमा विगतदेखि नै नेताहरूको विचार, दृष्टिकोण र अभिव्यक्तिमा दृढता र स्थिरताको कमी देखिँदै आएको छ। पछिल्ला घटनाक्रमहरूमध्ये, नेपाली कांग्रेसका सभापति शेरबहादुर देउवाको उत्तरप्रदेशका मुख्यमन्त्री योगी आदित्यनाथसम्बन्धी अभिव्यक्तिमा आएको परिवर्तनले यही विचलनलाई फेरि उजागर गरेको छ। प्रारम्भमा देउवाले सार्वजनिकरूपमा मुख्यमन्त्री आदित्यनाथ नेपाली दूतावासमा आएर नेपालमा राजतन्त्रको समर्थन नगर्ने बताएका थिए। तर त्यसपछिका दिनमा उनले उक्त भनाइ गलत सूचनामा आधारित रहेको भन्दै त्यसको खण्डन गरे।
यस घटनाले नेपाली राजनीतिज्ञहरूमा सूचनाको सत्यता पुष्टि नगरी अभिव्यक्ति दिने प्रवृत्ति गहिरो रहेको देखाउँछ। एकजना पूर्वप्रधानमन्त्री तथा पार्टी सभापतिको स्तरमा रहेको नेताबाट यति हल्का रूपमा गलत सूचना बाहिरिनु केवल व्यक्तिगत त्रुटि होइन, समग्र राजनीतिक संस्कारमा रहेको कमजोरीको प्रतिविम्ब हो। यो घटनाले नेतृत्वको जिम्मेवारी, संवेदी विषयप्रति सतर्कता र कूटनीतिक व्यवहारमा परिपक्वताको खाँचो देखाएको छ।
राजतन्त्रजस्तो संवेदनशील विषयमा सार्वजनिक रूपमा गलत सूचना दिनु, त्यसपछि त्यसको खण्डन गर्नु, र त्यसले राष्ट्रिय तथा अन्तर्राष्ट्रिय स्तरमा नेपाल सरकार र नेताहरूको छविमा नकारात्मक असर पार्नु कुनै सामान्य विषय होइन। राजनीतिक दृढता भनेको केवल आस्थामा अडिग रहनु मात्र होइन, जानकारीको आधारमा सटीक अभिव्यक्ति दिन सक्नु पनि हो। देउवाजस्तो अनुभवी नेताबाट यस्ता लापरवाहीपूर्ण अभिव्यक्तिहरू आउनु दुर्भाग्यपूर्ण हो।
यसले नेपाली राजनीतिमा गम्भीरताको अभाव र लोकप्रियताका लागि बोलिने हल्ला, अनुमान र भावनात्मक वक्तव्यको चलनलाई झल्काउँछ। अझ दुःखद पक्ष के भने, यस्तो प्रवृत्तिलाई सुधार्ने सट्टा खण्डनमार्फत लुकाउने प्रयास हुन्छ, जवाफदेहिताको भावना देखिँदैन।
यो केवल देउवाको व्यक्तिगत गल्तीको कुरा मात्र नभई समग्र राजनीतिक नेतृत्वको प्रतिबिम्ब हो, जहाँ सतही सोच, अपरिपक्व टिप्पणी, र जनउत्तरदायित्वको अभाव झल्कन्छ। यदि नेताहरूले आफ्ना विचारमा स्थिरता, सूचनाको विश्वसनीयता, र जनउत्तरदायित्वप्रति गम्भीरता देखाएनन् भने, जनताबीच विश्वास गुम्नेछ र राजनीतिक संस्थाहरूप्रति मोहभंग बढ्दै जानेछ।
यसकारण अब आवश्यक छ, राजनीतिज्ञहरूले बोल्नु अघि सोच्ने, तथ्यको पुष्टि गर्ने, र भावनात्मक वा असत्य वक्तव्य दिनबाट जोगिने अभ्यास विकास गर्नु। नेताको छविलाई बलियो बनाउने कुरा केवल ठूला भाषण होइन, सत्य, जिम्मेवारी र स्थिरतामूलक व्यवहार नै हो।
