# भरत दाहाल, राजनीतिक विश्लेषक
कमल थापा, होली वाईन चर्च र केपी ओली अन्तर्मनबाटै चुनावमा एक ! शेरबहादुर, पुष्पकमल, बाबुराम र माधव नेपाल हृदय देखि नै एक ढिक्का ! सबैले सबैका चुनाव चिन्ह बोक्ने, सबैले सबैका चुनाव चिन्हमा भोट हाल्ने ! नेपालीहरुका बिचमा प्रहसन गर्न कोही साम्यवादी, कोही प्रजातन्त्रवादी, कोही धर्मवादी र कोही राष्ट्रवादी !
यो अनैतिक ब्यापारमा चुनाव जित्ने कुरा मात्र छैन। यो मानिसलाई विचार, सिद्धान्त र मूल्यबाट च्युत गरेर दलाल बजारको वस्तु बनाउने साम्राज्यवादी उपभोक्तावाद हो। अनैतिक गठबन्धनको मूख्य पाटो यही हो। मानिसहरु तात्कालिक फाईदालाई हेरेर दलाल कित्ताको शिकार बनिरहुन् तर जीवनको लक्ष र बाटो समात्न नपाउन भन्ने षडयन्त्र हो यो।
यसले दिन खोजेको सन्देश भनेको विचार, सिद्धान्त र मूल्यको कुनै अर्थ हुँदैन, ब्यक्तिगत फाईदाको हिसाबकिताब नै सबथोक हो भन्ने कुरा स्थापित गर्नु हो। मानिस दिग्भ्रमित भैरहोस् र उसलाई उपयोग गर्न सजिलो भैरहोस् भन्ने यसको अभिष्ट हो। भ्रष्ट विदेशी दलालहरु मौलिक विचारधारा सहितको लक्ष र उद्देश्यबाट तर्सिरहेका छन्।
नेपालको संकटको आधारभूत कुरा विचारविहिनता, सिद्धान्तहिनता र मूल्यविहिनतासंग जोडिएको छ। चरम अवसरवाद र अपराधिकरणको समस्या यसैबाट उत्पन्न भैरहेको छ। नेपालीहरुमा विचार, सिद्धान्त र मूल्यको महत्व मर्न जाँदा नै आज समग्र चुनावी प्रणालीलाई माफियाहरुले नियन्त्रण गर्न सफल भएका छन्। दलभित्र इमान्दार मानिसहरु समाप्त भएर जानुको मकारण नै यही हो।
