काठमाडौँ, २८ साउनः
सस्कृति, पर्यटन तथा नागरिक उड्डयनमन्त्री बद्रीप्रसाद पाण्डे र दक्षिण कोरियाका पूर्वपर्यटनमन्त्री यु जिन रोंङबीच भेटवार्ता भएको छ । नेपाल भ्रमणमा रहनुभएका पूर्वमन्त्री रोंङसहितको प्रतिनिधिमण्डलले आज सिंहदरबारमा पर्यटनमन्त्रीसँग भेटवार्ता गरेको हो ।
भेटका अवसरमा मन्त्री पाण्डेले नेपाल कोरिया सम्बन्ध स्थापनाको ५०औँ वर्ष पुगेको स्मरण गर्दै दुई देशबीचको सम्बन्ध थप प्रगाढ बन्नेमा विश्वास व्यक्त गर्नुभयो । सन् २००५ मा नेपाल र कोरियाबीचको सांस्कृतिक सम्झौता गरिएको स्मरण गर्नुहुँदै दुई देशबीच संस्कृति शिक्षा, युवा खेलकुद र पर्यटनका क्षेत्रमा सहयोग पुग्ने उहाँको भनाइ थियो ।
मन्त्री पाण्डेले नेपाल र कोरियाबीचको हवाई भाडा केही महँगो भएको विषयमा आमजनगुनासो रहेको ध्यानाकर्षण गराउनुभएको थियो । उहाँले भन्नुभयो, “५० हजारभन्दाबढी नेपाली कोरियामा बस्नुहुन्छ । उहाँहरूलाई आवतजावत गर्न विमान भाडा महँगो हुने गरेको गुनासो गर्नुहुन्छ । यस विषयमा कोरियाली सरकारको ध्यानाकर्षण होस् ।”
नेपालमा कोरियाबाट बर्सेनि ३० हजार पर्यटक आउने गरेको तथ्याङ्क रहेको बताउँदै कोरियाका पूर्वमन्त्री यु जिनले नेपाल कोरिया दुई मित्र देशबीचको मित्रवत् सम्बन्धको प्रशंसा गर्नुभयो । उहाँले हवाई भाडा घटाउनका लागि कोरिया सरकारसँग पहल गर्ने बताउनुभयो ।
उहाँले मन्त्री पाण्डेलाई सन् २०२५ मा कोरिया भ्रमणको निम्तोसमेत दिनुभएको छ ।
रासस
