आजदेखि काठमाडौमा सातौँ अन्तर्राष्ट्रिय व्यापार मेला एवं चीन वस्तु प्रदर्शनी-२०१८ सुरू भएको छ। भृकुटीमण्डपमा सुरु भएको व्यापार मेलाको उद्घाटन गर्दै प्रधानमन्त्री केपी शर्माओलीले आउँदा पाँच वर्षको समयलाई निश्चित उपलब्धी, सफलताका लागि असाधारण ढंगले प्रयोग गर्ने बताउनुभयो।
२८ फागुनसम्म चल्ने मेलामा चिनियाँ वाणिज्य मन्त्रालय, व्यापार प्रवर्द्धन विभागकी उपप्रमुख चिन होङले नेपाल-चीन दाजुभाइ मुलुक मात्रै नभएर आपसी व्यापारिक तथा आर्थिक लेनदेन पनि तीव्र गतिले बढ्दै गएका मुलुक बनेको बताउनुभयो। दौत्य सम्बन्धको ६ दशक पार हुँदासम्म एकले अर्काप्रति सम्मान र पारस्परिक हितलाई प्राथमिकतामा राखेको उहाँको भनाइ थियो।
त्यस्तै अर्थमन्त्री युवराज खतिवडाले नेपालमा लगानी भित्र्याउनका लागि सरकारले उपयुक्त नीति ल्याउँदै प्रतिकूल कानुन, ऐन संशोधन गर्न तयार रहेको बताउनुभयो। साथै नेपालको निर्यातजन्य वस्तुको अन्तर्राष्ट्रिय उपभोक्तामाझ जानकारी गराउन जरूरी रहेको सन्दर्भमा यस्ता मेला प्रदर्शनीले निकै ठूलो सघाउ पुग्ने विश्वास व्यक्त गर्नुभयो।
नेपाल उद्योग वाणिज्य महासंघकी अध्यक्ष भवानी राणाले नेपालभित्र अनेकन मेला प्रदर्शनी हुँदै आएपनि अन्तर्राष्ट्रिय प्रदर्शनी कमै भएकाले महासंघले पहल गरेर विगत ७ वर्षदेखि यस्तो प्रदर्शनीलाई निरन्तरता दिइरहको बताउनुभयो। मेलामा चीनका ६० भन्दा बढी व्यवसायीका ७८ वटा स्टल रहेका छन्।
