निर्माणाधीन ४ सय ५६ मेगावाटको माथिल्लो तामाकोसीका साथै प्राधिकरण र निजी क्षेत्रबाट आउने बिजुलीको कारण बिजुली बढी हुने ठहर प्राधिकरणको छ। त्यसैगरी बर्षाहरूमध्ये २०१९-०२० मा ६ सय ६१ मेगावाट, २०२०-०२१ मा ९ सय ४६ मेगावाट, २०२१-०२२ मा ९ सय १ मेगावाट तथा २०२२-०२३ मा ६ सय ७० मेगावाट विद्युत् बढी हुने प्राधिकरणको प्रक्षेपण छ।
गत बर्षामा समेत ५ करोड बराबरको बिजुली भारतलाई बेचिएको उल्लेख गर्दै प्राधिकरणका कार्यकारी निर्देशक कुलमान घिसिङले बर्षामा बिजुली बढी हुने र हिउँदमा भने अझै पनि अभाव हुने बताउनुभयो। “माथिल्लो तामाकोसी र अहिलेको अवस्था अनुसार निजी क्षेत्रका आयोजनाहरू निर्माण हुँदा बर्षामा बिजुली बढी हुने र हिउँदमा भने अझै अभाव हुने देखिएको छ,” घिसिङले भन्नुभयो, “बर्षामा बढी भएको बिजुली छिमेकी राष्ट्र भारतमा बेच्ने र हिउँदमा किन्नुपर्ने अवस्था आउने हुनाले इनर्जी बैंकिङको कुरा अघि बढाएका छौं।”
प्रक्षेपणले आगामी पाँच वर्षसम्म भने विद्युत् अभाव हुने देखाएको छ। जसअनुसार २०२२-२३ को हिउँदमा समेत ३ हजार ३ सय ६५ मेगावाट विद्युत् माग पुगे पनि २ हजार ७९ मेगावाट मात्र आपूर्ति हुनसक्ने तथा यसको कारणले ६ सय ७० मेगावाट अभाव हुने देखिएको छ।
२०२१-२२ मा ३ हजार ६२ मेगावाट माग हुने र आपूर्ति भने २ हजार ५५ मेगावाटमात्र हुनेछ भने २०२०-०२१ मा माग २ हजार ६ सय ३८ मेगावाट पुग्ने र आपूर्ति भने १ हजार ९ सय २८ मेगावाट हुनेछ। यस्तै, सन् २०१९-०२० मा २ हजार २ सय २५ मेगावाट पुग्ने र आपूर्ति भने १ हजार ६ सय ८६ मेगावाट मात्र हुने तथा सन् २०१८-०१९ मा १ हजार ८ सय ४२ मेगावाट माग पुग्ने तथा आपूर्ति भने १ हजार ४ सय ७० मेगावाट हुने प्राधिकरणले प्रक्षेपण गरेको छ।
अहिले भने विद्युत्को माग १ हजार २ सय ८० मेगावाट माग रहेकोमा तीन सय मेगावाट अभाव छ। हाल प्राधिकरणले भारतबाट ३ सय मेगावाट आयातसमेत गरिरहेको छ।
